Gjatë ditës së sotme janë sulmuar dy autobusë në Studenicë të Istogut që bartnin rreth 170 pelegrinë serbë, raporton lajmi.net.

Pas këtij sulmi ka reaguar edhe presidenti i vendit Hashim Thaçi, i cili e ka dënuar ashpër këtë sulm ndaj pelegrinëve serbë.

Ai përmes një postimi në profilin e tij zyrtar në rrjetin social Facebook, ka kërkuar nga organet e rendit dhe ligjit që t’i nxjerrin para drejtësisë siç është shprehur Thaçi, kryesit e këtij sulmi të shëmtuar, raporton lajmi.net.

Reagimi i plotë i Thaçit pa ndërhyrje:

Si President i Republikës së Kosovës, e dënoj ashpër sulmin ndaj pelegrinëve serbë në fshatin Studenicë të Istogut.

Në shoqërinë dhe shtetin tonë, pa dallim etnik, të gjithë qytetarët tanë e gëzojnë të drejtën e lëvizjes së lirë, të shprehjes së ndjenjave religjioze si dhe të vizitës së objekteve fetare.

Cenimi i kësaj të drejte është akt i papranueshëm.

Kërkoj nga organet e rendit dhe ligjit që t’i nxjerrin para drejtësisë kryesit e këtij sulmi të shëmtuar. /Lajmi.net/