Qeveria e majtë greke e cila po kundërshton gjithë Perëndimin që nga momenti i fitores së zgjedhjeve parlamentare është parë me simpati nga lëvizja majtiste kosovare, Lëvizja Vetëvendosje, shkruan lajmi.net.

Kjo simpati është shprehur hapur edhe dje për referendumin grek, nga kryetari i Prishtinës, Shpend Ahmeti.

I pari i kryeqytetit kosovar që vjen nga Lëvizja Vetëvendosje thotë se shembulli grek i demokracisë duhet ndjekur në gjithë Europën.

Por krejtësisht ndryshe e sheh këtë referendum, ish kundërkandidati i Ahmetit për kryetar të Prishtinës nga AAK, Besnik Tahiri.

Ai thotë se ky referendum është një budallaki.

Lexoni të plotë statuset e postuara në Facebook, nga Ahmeti dhe Tahiri: 

Shpend Ahmeti: 

Pa marrë parasysh se a jeni për apo kundër masave shtrënguese të përcaktuara nga Evropa për Greqinë, sot një popull po vendos vetë për fatin dhe opcionet para vetës ne krizë e frikë të madhe nga secili opcion. 

Dikush mund ta quaj këte largim nga përgjegjësia të qeverisë greke, por sot e gjithë Evropa po shikon kah Greqia vendimin në referendum të popullit grek. Në fakt do të ishte mirë një referendum edhe në shtetet Evropiane mbi kushtëzimet e vendosura nga bankierët ndërkombëtar. Demokracia do të ishte e plotë. 

Në ora 21 do të kuptojmë se a është Nai apo Ohi, Po ose Jo dhe kjo do të përcaktojë shumë gjëra ditëve të ardhshme, por po bëhet me demokraci direkte. Të gjithë të tjerët mund të mos e respektojmë vendimin përfundimtar por megjithate duhet të kemi respekt për mundësinë që populli grek e ka sot, ta thotë fjalën e vetë. 

Besnik Tahri: 

Referendumi grek do të mbahet në mend si një ndër ‘budallakitë’ më të mëdha që mundet me bë një komb! Ky veprim është i ngjajshëm me referendumin e Sllobës në vitin 98 për Kosovën. (lajmi.net)