Policia largon gurët nga Sheshi
Kompanitë për pastrimin kryeqytetit, në përcjellje të forcave policore, në mëngjes kanë kontrolluar të gjithë kontejnerët në Shesh, për të larguar mjetet e forta.
Lajme
Policia që po patrullon në këmbë, po kërkon që të hiqen edhe mjete tjera të forta përskaj lokaleve të ndryshme në kryeqytet.
Tri partitë opozitare, Lëvizja Vetëvendosje, Aleanca për Ardhmërinë e Kosovës dhe Nisma për Kosovën do të protestojnë sot për siç thonë kundër “kapjes së shtetit”. Protesta është paralajmëruar të fillojë në orën 14:00.
Marshi fillon në sheshin “Zahir Pajaziti”, vazhdon drejt Gjykatës Kushtetuese, KEDS-it, pastaj te RTK-ja dhe në sheshin “Skënderbeu”.
Kërkesat e protestës të së shtunës janë shfuqizimi i vendimit për shtrenjtimin e energjisë elektrike, shpallja e Trepçës ndërmarrje publike me status të veçantë, shkarkimi i menaxhmentit të RTK-së, kërkohet edhe dorëheqja e kryetarit të Gjykatës Kushtetuese, Enver Hasani, ndërsa qeverisë i kërkohet shkarkimi i ministrit të Drejtësisë, Hajredin Kuçi.