Të mbijetuarit dhe familjarët e të vrarëve kanë bërë homazhe në ambientet e burgut aty ku 19 vjet më parë u vranë 160 të burgosur.

Në burgun e Dubravës janë bërë homazhe në vendin e masakrës. Aty i pranishëm ka qenë edhe deputeti i Kuvendit të Kosovës, Rasim Selmanaj, i mbijetuari i kësaj masakre, shkruan lajmi.net.

Këtë ngjarje e ka kujtuar edhe presidenti i Kosovës, Hashim Thaçi. Përmes një postimi në Facebook ai ka thënë se kjo ngjarje përbën një nga tragjeditë më të mëdha, autorët e së cilës ende janë të lirë.

“Në përvjetorin e masakrës në Burgun e Dubravës i kujtojmë të gjithë të burgosurit shqiptarë që përjetuan jo vetëm persekutime sistematike, por edhe vrasje mizore nga forcat policore serbe”, është shprehur ai.

Nëntëmbëdhjetë vjet më parë brenda burgut të Dubravës u vranë 160 të burgosur shqiptarë dhe u plagosën më shumë se 300 të tjerë.

Kjo masakër zgjati disa ditë, përkatësisht nga 19 deri më 24 maj 1999. /Lajmi.net/