Isa Mustafa e Shpend Ahmeti do të jenë për herë të parë, ballë për ballë, këtë të premte, në një debat zgjedhor, të organizuar nga Televizioni Publik i Kosovës (RTK).

Gara për Prishtinën do të jetë jashtëzakonisht e fortë, e gjithashtu edhe debati i parë midis ty pretendentëve për ta udhëhequr Kryeqytetin në katër vjetët e ardhshme pritet të jetë i fortë, në ballafaqimin e parë direkt.

Të dy kandidatët kanë konfirmuar praninë e tyre në debatin e të premtes.

“Sapo më telefonoi RTK për një debat me kandidatin Mustafa të premten në ora 20:30 live. Unë do të jem aty!”, ka njoftuar në Facebook, Shpend Ahmeti i Vetëvendosjes, duke konfirmuar pjesëmarrjen e tij.

Burime brenda RTK’së kanë konfirmuar për lajmi.net edhe pjesëmarrjen e Isa Mustafës në këtë debat.

Kryetari aktual i Prishtinës, Isa Mustafa, nuk i është përgjigjur asnjë debati parazgjedhor para raundit të parë të zgjedhjeve. Ai nuk ka pranuar asnjë ftesë të televizioneve për të dalë përballë 8 kandidatëve tjerë që garuan për Kryeqytetin.

Të dy kandidatët janë shprehur të bindur në fitoren e tyre, më 1 dhjetor, kur qytetarët do t’u drejtohen sërish kutive të votimit.

Ata kanë filluar ta ngacmojnë qysh tash njëri-tjetrin nga distanca. Mustafa e ka akuzuar Ahmetin se ka ndarë votuesit në urbanë dhe ruralë, ndërsa Ahmeti ka thënë se Mustafën e ka kapur paniku i humbjes.

E premtja do të sjellë përballjen më të fortë mediale që është zhvilluar për Prishtinën deri tash.