Një sondazh online i “Reuters” dhe “Ipsos” i këtij muaji mori në pyetje 2,809 amerikanë për të votuar mbi nivelin e rrezikshmërisë që një listë me shtete, organizata dhe individë, mund të përbëjë ndaj Shteteve të Bashkuara.

Sondazhi tregoi se 34 për qind e republikanëve zgjodhën Obamën si rrezik të pashmangshëm, përpara Putinit, me 25 për qind, i cili akuzohet për agresion ndaj Ukrainës, dhe Asadit, me 23 për qind, i cili akuzohet nga vendet perëndimore se ka përdorur gazin klorin dhe fuçi baruti ndaj shtetasve të tij.

Duke parë nivelin e polarizimit në politikën amerikane, rezultatet nuk përbëjnë ndonjë surprizë, thotë Barry Glassner, një sociolog dhe autor i “Kultura e Frikës: Pse amerikanët kanë frikë nga gjërat e gabuara”.

“Ka një tentativë për të demonizuar personin që është aktualisht në pushtet”, tha Glassner, duke shtuar se “alarmi frikësues” nga partitë republikane dhe demokratike do të përbëjë edhe shtyllën e fushatës zgjedhore të Presidencialeve 2016. “Mediet televizive këtu, por edhe politikanët amerikanë përpiqen të shesin e të mbjellin shumë frikë”, tha ai.

Sondazhi i “Ipsos”, i zhvilluar nga 16 deri më 24 mars, përfshinte 1,083 demokratë dhe 1,059 republikanë. 27 për qind e republikanëve thanë se Partia Demokratike ishte kërcënim i pashmangshëm ndaj SHBA-ve, ndërsa 22 për qind e demokratëve zgjodhën republikanët si kërcënim.

Ndërkaq, njerëzit e pyetur në këtë sondazh ishin më shumë të shqetësuar në lidhje me kërcënimet mbi sulmet potenciale terroriste. Militantët e Shtetit Islamik u përzgjodhën si kërcënimi më i madh, me 58 për qind të atyre që u përgjigjën, ndërsa Al Kaeda, me 43 për qind. Pas tyre, lideri koreano-verior, Kim Jong-un, me 34 për qind, dhe Ajatolla Ali Khamenei i Iranit, me 27 për qind. Por, përpara se të vinim te këta dy emra “diktatorësh”, 39 për qind e përgjigjeve konsideronin si rrezik sulmet kibernetike. Në listën e kërcënimeve konsiderohej edhe trafikimi i drogave.

Në sondazh, demokratët duken më të shqetësuar në lidhje me ndryshimet klimatike sesa republikanët, respektivisht me 33 për qind dhe 27 për qind të të pyeturve. /Top Channel/