Hetimet për keqpërdorime në procesin e privatizimit tregojnë se shumë zyrtarë të lartë të politikës janë të përfshirë në to. Javën e kaluar për privatizimin e fabrikës “FAN” të Podujevës u arrestuan zyrtarë e ish-zyrtarë të lartë të AKP-së. I dyshuar për këtë rast është edhe deputeti i LDK-së, Naser Osmani.

Zëri raporton se një dosje prej më shumë se 2 mijë faqesh për keqpërdorime në rastin e privatizimit të fabrikës së gomës “Ballkan” të Suharekës, ku protagonisti i saj kryer është ish-drejtori i Agjencisë Kosovare të Mirëbesimit, tash AKP, Ahmet Shala, ishte dorëzuar në prokurori.

Ahmet Shala është dërguar ambasador në Japoni.

Dyshime për keqpërdorime gjatë privatizimit ka edhe në fabrikën e çimentos “Sharr Cem”, në Han të Elezit. Po ashtu edhe për privatizimin e “Ferronikelit” por dhe të “Hotel Grand”, ku i ndjeri Dino Asanaj, akuzohej se kishte marrë ryshfet.

Për ish-drejtorin e Agjencisë Kosovare të Mirëbesimit, Ahmet Shala, sipas burimeve të gazetës Zëri, ai është duke u hetuar nga EULEX-i në tri raste të privatizimit.

“Ai është duke u hetuar nga hetuesit e EULEX-it për së paku tre raste, nga gjashtë raste sa janë duke i hetuar ata”, ka thënë ky burim për të përditshmen \”Zëri\”.