PDK thotë se Fondi Pensional mund të përdoret për Fondin e Punësimit
Paratë e Trustit Pensional mund të shfrytëzohen për krijimin e Fondit të Punësimit, thotë nënkryetari i PDK-së, Memli Krasniqi, në një reagim ndaj deklaratës së kryetarit të bordit të këtij Trusti, i cili ka thënë se mjetet e Trustit nuk bën të preken pasi këtë nuk e lejon rregullativa aktuale ligjore.
Lajme
Nënkryetari Krasniqi ka reaguar ndaj një deklarate të kryetarit të Bordit të Trustit Pensional, Ymer Havolli, rreth investimit të kursimeve të Trustit në Kosovë. PDK në programin e vet zgjedhor ka planifikuar që këto mjete t’i investojë për zhvillimin ekonomik të vendit.
“E lexova një deklaratë të z. Ymer Havolli, i cili ka të drejtë kur thotë që korniza aktuale ligjore e kufizon mundësinë e përdorimit të Trustit për Fondin e Punësimit. Mirëpo, ish punëtori i Isa Mustafës në Riinvest \’harron\’ të tregojë që Kuvendi i Kosovës ka autoritetin kushtetues për të bërë ndryshimet e nevojshme ligjore për ta jetësuar projektin tonë të Fondit të Punësimit”.
“Që kur e kemi shpallur Fondin e Punësimit e kemi bërë të qartë që do të bëjmë plotësimet dhe ndryshimet e nevojshme të ligjeve ekzistuese dhe reforma legjislative të posaçme për ta mundësuar këtë fond jetik për zhvillimin ekonomik të vendit tonë”, ka deklaruar Krasniqi në një postim në faqen e tij në Facebook.