PD kërkesë për mocionin me debat me Ramën

Problemi i krijuar me listat e ndihmës ekonomike, thuajse në të gjitha qytetet e Shqipërisë u denoncua dje nga kryedemokrati Lulzim Basha, i cili akuzoi kryeministrin Edi Rama për metoda naziste e genocideske të trajtimit të popullit.

Lajme

20/02/2018 18:38

Menjëherë pas deklaratës së Bashës për “Holokaustin e Edi Ramës”, Partia Demokratike ka hedhur një tjetër hap duke dorëzuar sot në Kuvend kërkesën për mocion me debat me kreun  e qeverisë.

Çështja e nxehtë mbetet po ajo e heqjes nga skema e ndihmës ekonomike të më shumë se 20 mijë familjeve të varfra në të gjithë vendin.

Në kërkesën e PD nënvizohet se kemi të bëjmë me një përjashtim abuziv, “të bërë në procedura aspak transparente, në tejkalim të përcaktimeve ligjore dhe, me shumë gjasë, në kushtet e ndjekjes penale”.

Partia Demokratike e kërkon debatin me kryeministrin për këtë çështje që në seancën e së enjtes, sepse nga kontaktet direkte, qindra kryefamiljarë kanë pohuar se nuk kanë para për bukë në kuptimin e parë të fjalës.

“Situata e verifikuar deri më tani është shkaktuar prej papërgjeshmërisë së qeverisë dhe ka rënduar gjendjen e këtyre familjeve në kufijtë e një drame njerëzore dhe të një emergjence kombëtare, pasi ndihma ekonomike është e vetmja mundësi mbijetese për ta”, theksohet në këtë kërkesë.

PD argumenton se “e cilëson kriminal dhe të papërgjegjshëm aktin e përjashtimit të mbi 20 mijë familjeve në nevojë, duke i lënë në mëshirën e fatit, pa u dhënë asnjë sqarim dhe duke u hequr të drejtën kushtetuese, të përcaktuar në nenin 52”.

“Aty thuhet se “Kushdo, kur mbetet pa punë për shkaqe të pavarura nga vullneti i tij, dhe, kur nuk ka mjete të tjera jetese, ka të drejtën e ndihmës në kushtet e parashikuara me ligj”, nënvizon PD.