Pas tragjedisë në Prizren, komuna ‘siguron’ shtëpitë me rrathë kanalizimi (Foto)
Komuna e Prizrenit ka tentuar ta gjejë një zgjidhje për shtëpitë në rrugën ‘Marin Barleti’ të cilat rrezikojnë të shemben.
Lajme
Kjo është rruga ku ditë më parë humbi jetën një vajzë 3 vjeç, pasi një pjesë e shtëpisë ku banonte u rrënua, raporton lajmi.net.
Familja e saj jeton në kushte të rënda sociale ndërkohë që komuna jo vetëm që nuk ka bërë zgjidhje për rastin e tyre por edhe i ka cilësuar si uzurpatorë të pronës.
Por sot në përpjekje për të shmangur ndonjë lëndim të ndonjë personi tjetër nga shembja eventuale e këtyre shtëpive në këtë zonë të mbrojtur të Prizrenit, komuna ka vendosur disa rrathë betoni përreth objektit, raporton lajmi.net.
Megjithëkëtë, kjo mënyrë e trajtimit të këtij problemi nga komunarët, po cilësohet si veprim tepër i dobët nga ana e qytetarëve dhe përfaqësuesve të shoqërisë civile.
Njëri prej tyre, Ismet Kryeziu që është nga ky qytet, ka publikuar në facebook dy fotografi të këtij vendi.
“Komuna e Prizrenit, për te mbrojtur trashëgiminë kulturore dhe qytetaret, krijon siguri për qytetaret me gypa te kanalizimit”, shkruan Kryeziu.
“Kualiteti i gypave është i garantuar si produkt vendor, madje me duket se garancia e këtyre gypave është edhe me e madhe kur besohet se vijnë nga një kompani e një opozitari”, deklaron ai.
Nga ana tjetër, organizata ‘Ec ma ndryshe’ ka deklaruar se moskujdesi ndaj trashëgimisë dhe lënia e monumenteve në këtë gjendje, tashmë ka prodhuar edhe tragjedi.
Kjo organizatë kërkon dorëheqjen e menjëhershme të kryetarit të Komunës së Prizrenit, Ramadan Muja, ministrit të Kulturës, Kujtim Shala dhe ministrit të Mjedisit e Planifikimit Hapësinor, Ferid Agani, përfshirë dhe përgjegjësinë penale për shkaktim të vdekjes si rezultat i papërgjegjësisë./lajmi.net