Paraburgim për “Burdushin”, flet avokati i tij
Dje Policia e Kosovës ka kryer një bastisje në shtëpinë e mjekut popullor, Hysri Peqani ose ndryshe i njohur si “Burdushi”.
Lajme
Ata gjatë bastisjes kanë konfiskuar armë pa leje dhe dokumentacione të ndryshme, 3 vetura dhe një shumë të caktuar të parave, transmeton lajmi.net.
Policia gjithashtu ka arrestuar Hysri Peqanin dhe të njëjtin e kanë dërguar në mbajtje, ndërsa sot prokuroria ka kërkuar që të shqiptohet masa e paraburgimit.
Lajmi.net ka kontaktuar Asdren Hoxhën, avokatin e të dyshuarit për ta pyetur në lidhje me çështjen dhe ai është shprehur se e kanë kundërshtuar fuqishëm vendimin e prokurorisë.
“E kemi mbajt seancën, prokuroria ka kërkuar caktimin e paraburgimit, ndërsa ne fuqishëm e kemi kundërshtuar dhe po presim tani për vendimin e gjyqtarit”, është shprehur Asdren Hoxha, avokati i “Burdushit”.
Hoxha gjithashtu ka thënë se çështja e klientit të tij është krejtësisht e pabazuar në prova dhe beson fuqishëm se kërkesa e prokurorit do të refuzohet.
“Ne besojmë që kërkesa e prokurorit do të refuzohet, sepse është absolutisht e pabazuar. Provat mendoj që janë jorelevante, çështja është e pabazuar në prova”, ka përfunduar Hoxha. /Lajmi.net/