Në kuadër të mbledhjes së pestë të përbashkët në mes Qeverisë së Kosovës dhe Këshillit të Ministrave të Shqipërisë, zëvendëskryeministri i parë dhe ministri i Punëve të Jashtme, Behgjet Pacolli, ka propozuar inicimin e studimit të përbashkët ndërkombëtar: “Kombi shqiptar në 50 vitet e ardhshme”, dokument ky, që do të shërbente si një platformë zhvillimore fuqizuese e kombit shqiptar në Ballkan.

“Përballë sfidave të shumta, shqiptarët duhet ta kenë të qartë të ardhmen e tyre së bashku. Sot, në mbledhjen e dy qeverive, të Kosovës dhe Shqipërisë, me mbështetjen e Kryeministrit Rama dhe Haradinaj iniciova studimin e përbashkët ndërkombëtar ‘Kombi shqiptar në 50 vitet e ardhshme.’ Ky dokument do të shërbejë si platformë zhvillimore fuqizuese e kombit shqiptar në Ballkan” , ka thënë kryediplomati kosovar, Pacolli, shkruan lajmi.net.

Mbledhja e përbashkët e dy qeverive këtë vit është mbajtur në qytetin e Pejës, ndërkohë që do të nënshkruhen një sërë Marrëveshjesh në mes dy shteteve. /Lajmi.net/