Pa PDK-në nuk krijohen institucionet
Këshilltari i kryeministrit Hashim Thaçi, Adri Nurellari ka thënë se me takimet e fundit joformale në mes të Hashim Thaçit, Isa Mustafës dhe Ramush Haradinajt është krijuar një hap pozitiv që liderët të kenë mundësi të komunikojnë.
Lajme
Në një intervistë dhënë për “Epoka e Re”, Nurellari ka thënë se partitë e Bllokut e kanë kuptuar se pa PDK-në ata ë mund të krijojnë institucione, andaj sipas tij, tashmë janë ulur gjakrat dhe mllefi që “e kanë karakterizuar politikën e bllokut”.
“Është një hap i parë pozitiv që palët flasin dhe komunikojnë sepse ishte krijuar një situatë absurde, ku logjika e jonegociatave ka qenë totalisht e gabuar dhe e pamenduar mirë.
“Tani blloku e ka kuptuar qartë se zgjidhja mund të gjendet vetëm duke bashkëpunuar me PDK-në. Ata vazhdimisht pa PDK-në kanë dështuar t’i realizojnë objektivat e vet”.
“Ky komunikim shënon hapin e parë pozitiv sepse janë ulur gjakrat dhe mllefi i cili e ka karakterizuar politikën e bllokut gjatë këtyre muajve. Tani ka një lloj vetëdijesimi se është dinjitoze dhe domosdoshme të komunikohet dhe bashkëpunohet”.
Nurellari ka thënë se lideri i PDK-së, Hashim Thaçi preferon më shumë zgjidhjen e ngërçit sesa zgjedhjet e reja.
“Mendoj se Thaçi preferon një zgjidhje, sepse vonesa e shkaktuar deri tani padyshim se ka kosto për Kosovën dhe zgjedhjet e reja do ta zvarritin formimin e institucioneve më shumë sesa vendi ka nevojë ose leverdi”, ka thënë ai.