Shaip Kamberi nga Partia për Veprim Demokratik i cili do të jetë deputet në Parlamentin e Serbisë, tha se akoma nuk kanë marrë asnjë ftesë për të hyrë në koalicione qeveritare.

Në një intervistë dhënë për “Zëri”, Kamberi ka thënë se objektivi kryesor i pjesëmarrjes në zgjedhje ka qenë që të përmirësohet pozita e shqiptareve të Luginës.

“Ne ende nuk kemi asnjë ftesë nga cilado parti për të biseduar rreth pjesëmarrjes tonë në koalicionet qeveritare”.

“Objektivi ynë kryesor i pjesëmarrjes në këto zgjedhje ëshët që përmes kësaj forme të angazhimit politik në nivelin parlamentar të ndikojmë në përmirësimin e pozitës së shqiptarëve në Luginë të Preshevës”.

Edhe pse Shaip Kamberi nuk e di nëse do të jetë pjesë e Qeverisë, por një gjë e ka të qartë, se Kosovën do ta njoh si shtet, edhe në qoftë se është në pozitë.

Ai tha se njohja e Kosovës nga ana e Serbisë do të ndikonte në stabilitetin e paqes në Ballkan.

“Jemi në Qeveri ose jashtë saj, qëndrimi ynë si PVD nuk ndryshon. Kosova është shtet i veçantë me kufij të përcaktuar dhe të njohur nga fuqitë kryesore të botës”.

“Po ashtu besojmë se njohja e shtetësisë së Kosovës nga ana e Serbisë është element i rëndësishëm i stabilitetit të paqes afatgjate në Ballkan”.