Ministri Hasani para Qeverisë paraqiti një kërkesë të Komunës së Malishevës për krijimin e zonës së vecantë ekonomike ku prek tri fshatra, Banjën e Malishevës, Bellanicën dhe Senikun.

Kryetari i Nismës për Kosovë, Fatmir Limaj është me origjinë nga ky fshat që pritet të preket nga shpronësimi.

Mirëpo ky propozim i ministrit Hasani u kundërshtuar pikërisht nga ish-bashkëpartiakët e dikurshëm, ministri Abelard Tahiri dhe Besim Beqaj.

Sipas Abelard Tahirit Qeveria e Kosovës nuk mund të hyjë në këso obligime pa e ditur saktë koston e projektit për shpronësim, meqë në arsyetimin e tij, ministri Hasani nuk kishte përmendur fare koston e shpronësimit.

E se për çfarë kosto bëhet fjalë, Ministri Hasani i tha Gazetës Jeta në Kosovë se nuk e di këtë, pasi që sipas tij Ministria e Ambientit duhet ta bëjë vlerësimin, mirëpo për një gjë thotë se është i sigurt, që nuk do të kushtojnë shumë.

“Komuna e Malishevës është një ndër komunat që ka më sa paku pronë publike, na kemi dashtë me shpallë me interes të veçantë, tani është përgjegjëse Ministria e Ambientit me pa se sa qysh tek, është punë e vlerësimit, veç një mundem me thanë që ato nuk munden me kushtu shumë sepse ato janë sipas informatave që i kemi, çmimet nuk janë të larta”, tha ministri Hasani për Gazetën Jeta në Kosovë.

Themelimi i kësaj zone të veçantë është propozuar të bëhet në Komunë të Malishevës që prej tri fshatra, Banjën, Bellanicën dhe fshatin Senik.

“Saktësisht nuk mundem me fol, veç është dikun mbi 50 hektar”, tha tutje për Gazetën JNK ministri Hasani.

Meqë zëvendës kryeministri Fatmir Limaj është nga fshati Banjë e Malishevës, Ministri Hasani thotë se nuk e di nëse planifikimi që është bërë prek ndonjë pjesë të pronave të Limajt apo familjarëve të tij.

“Nuk e di sa prek në ato fshatra, duhet me i hy me kadastër, sa e prek Banjën e sa fshatrat tjera, tash mundet me prek naj parcelë të fshatit, por jo me shku te fshati. Nuk e di nëse do të prek ndonjë pronë të z.Limaj, nuk besoj sepse s’kemi këqyrë ashtu, ajo është kërkesë e Komunës për shkak të pozitës për themelimin e zonës ekonomike”, tha në mes tjerash ministri Hasani.

E për këtë investim të madh të shpronësimit të mbi 50 hektarëve tokë private, Ministri Hasani thotë për Gazetën Jeta në Kosovë se nuk e ka diskutuar fare këtë temë me kryetarin e partisë së tij, Fatmir Limajn, meqë ky i fundit ka qenë jashtë vendit.

Mirëpo meqë kjo çështje fillimisht u kundërshtua nga ministrat e PDK-së dhe me vendim të kabinetit qeveritar u vendos të shtyhej për mbledhjen tjetër, Hasani thotë se do ta diskutoj me Limajn tani.

“S’na ka ra me u taku sepse ka qenë jashtë vendit, por besoj se do të takohemi para se të hyjë në votim në Qeveri”, tha tutje Hasani për Gazetën JnK.

Mirëpo për Hasanin, nuk është problem kostoja, sepse sipas tij, kur është interesi madhor ekonomik, shteti duhet të marrë përsipër edhe koston e cila do të shërbente për punësim.

Gazeta Jeta në Kosovë ka provuar të kontaktoj edhe ministrin Abelard Tahiri, mirëpo ai nuk është përgjigjur në thirrjet dhe mesazhet e Gazetës.

Mirëpo në mbledhjen e Qeverisë që u mbajtë të martën, Tahiri ishte interesuar të marrë më shumë informacione për këtë shpronësime.

Ai kishte frikë se këto shpronësime mund të sjellin implikime buxhetore dhe mund të kishte shkelje të ligjit për buxhet.

Sipas tij, nëse pronat që do të shpronësohen, do të jenë private, kostoja financiare mund të shkoj deri në dhjetëra miliona euro.

“Prej përvojës nga e kaluara, që vendimet e tilla mund të kontestohen, mendoj që duhet një trajtim më i thellë më i qartë, me pa edhe njëherë se cila është kostoja financiare, mund të shkoj me dhjetëra miliona, nëse kemi të bëjmë me prona private”, kishte thënë Tahiri në mbledhjen e Qeverisë.

Gazeta Jeta në Kosovë i ka shkruar edhe Komunës së Malishevës për të marrë dokumentacionin për të parë se ku kanë propozuar të krijohet kjo zonë e veçantë ekonomike.

Kryetari i Komunës së Malishevës, Ragip Begaj e ka konfirmuar që e ka marrë kërkesën, mirëpo ata end e nuk janë përgjigjur në pyetjet e Gazetës JNK.

Për zonën nuk ka folur lideri i NISMAS Fatmir Limaj por në këtë iniciaticë i zëshëm është treguar djali i tij Durim Limaj. “Malisheva do të bëhet me zonë ekonomike. Me apo pa dashjen e disave! Veç vonim, pshtim ska kjo punë. Malisheva nuk do të mbetet zorrë qorre, ani pse disa duan te lënë të tillë” ka shkruar Limaj në Facebook.

Debati për zonën pritet të vazhdoj në mbledhjet e ardhëshme të qeverisë pasi në mbledhjen e fundit debate është ndërprerë nga kryeministri Haradinaj.