“Nisma ka pushtuar shkollat e Malishevës”, protestojnë nxënësit

Në shenjë pakënaqësie, me largimin e disa profesorëve të tri shkollave të mesme të Malishevës, më shumë se 100 nxënës kanë protestuar sot rreth orës 09:00, para kuvendit komunal të Malishevës. Partitë opozitare në këtë komunë, akuzojnë udhëheqjen komunale se po bëjnë spastrim të punëtorëve të arsimit dhe punësim mbi baza politike. 

Lajme

01/09/2014 15:17

Nxënësve protestues, u janë bashkuan edhe 35 mësimdhënës të tjerë. E kjo protestë ka përfunduar në ora 11:30, pa ndonjë incident. 

Kështu bënë të ditur për KosovaPress, rreshter Vesel Gashi, nga drejtoria e Policisë së Prizrenit. 

“Sot rreth orës 09:00, mbi 100 nxënës kanë protestuar para kuvendit komunalë të Malishevës. Më pas atyre ju bashkuar edhe personeli i shkollave, rreth 35 mësimdhënës. Ndërsa një delegacion i protestuesit, rreth orës 11 e gjysmë, ka biseduar me kryetarin e Komunës së Malishevës dhe drejtorin e arsimit. Pas bisedimeve në mes të delegacionit dhe zyrtarëve të komunës, protesta është shpërndarë, pa ndonjë incident”, ka thënë rreshter Gashi, nëpërmjet një telefonate. 

E lidhur me largimin nga puna, përveç mësimdhënësve të tri shkollave të mesme, kanë reaguar edhe partitë opozitare një ditë më parë, duke thënë se ata që udhëheqin me këtë Komunë u hakmorën ndaj anëtarëve të partive opozitare. 

PDK-ja dhe VV-ja kanë akuzuar se militantët e NISMA-së kanë pushtuar shkollat e Malishevës. 

Sipas PDK-së diferencimet më të mëdha janë bërë në tri shkollat e mesme të Komunës së Malishevës, e cila ka listuar të gjitha rastet ku ata mendojnë se janë bërë shkelje. 

Edhe Lëvizja Vetëvendosje, Qendra në Malishevë, thotë se me kohë ka tërhequr vërejtjen se Kryetari Begaj dhe drejtori për arsim Blerim Thaçi po i zbatojnë direktivat e partisë për punësim në sektorin e Arsimit. 

VV më tej ka numëruar një varg shkeljesh të ligjit me rastin e pranimit të kuadrit arsimor.