Nga burime brenda LDK-së, Gazeta Metro mëson se ata janë të bindur që do ta marrin postin e kryeministrit, si në koalicion me Lëvizjen Vetëvendosje, ashtu edhe me PAN-in, porse u duhet ta presin rezultatin e mandatarit të parë, Ramush Haradinajt.

“LDK-ja do ta marrë postin e kryeministrit dhe këtë gjë e di edhe Vetëvendosje, e cila tani ka rritur presionin publik për të bërë koalicion të shpejtë. Nëse Vetëvendosje do koalicion me LDK-në, gjithsesi se duhet të na japë postin e kryeministrit, sepse këtë e kemi të sigurt në raport me PAN-in, nëse Haradinaj dështon ta formojë qeverinë herën e parë”, ka thënë një prej njerëzve të LDK-së për Gazetën Metro.

Sipas tij, koalicioni PAN do të provojë dhe nëse Haradinaj i ka votat, ai do ta formojë qeverinë. Por, në rast dështimi, nuk kanë ku të shkojnë tjetër përveçse te LDK-ja, që nëse nuk vendosë këshilli drejtues të shkojmë në opozitë, në koalicion të gjerë me PAN-in, LDK-ja do ta ketë të sigurt mandatarin e dytë dhe Hoti do të bëhet kryeministër.

Opsion tjetër, sipas tij, është shkuarja në opozitë, sepse si kryeministër, Avdullah Hoti do të forcohej dhe do të ishte lideri i ardhshëm i LDK-së, gjë që po u pengon disa nënkryetarëve të partisë.

Një koalicion me Lëvizjen Vetëvendosje dhe me Kurtin kryeministër, ai thotë se në LDK po shihet edhe më i dëmshëm dhe do ishte debakël për LDK-në në Prishtinë dhe përgjithësisht në këto zgjedhje lokale.

Kujtojmë që Lidhja Demokratike e Kosovës kishte përfituar më së shumti edhe pas bllokadës së kaluar.

Pas bllokadës gjashtëmujore, LDK-ja kishte bërë koalicion dhe kishte arritur ta marrë postin më të rëndësishëm në vend, duke e bërë Isa Mustafën kryeministër.