Jozyrtarisht nga banorët mësohet se foshnja është zhdukur bashkë me të atin, trupi i të cilit është gjetur por akoma po kërkohet për fëmijën.

Megjithatë banorët ankohen se nuk ka asnjë organizim nga autoritetet shtetërore për të ndihmuar dhe organizuar banorët të cilët po ashtu, edhe pothuajse 40 orë pas përmbytjeve nuk dinë saktë sa bashkëfshatarë të tyre rezultojnë të zhdukur dhe as ku t’i kërkojnë.

Ambulanca private në Hasanbeg dje pasdite dhe sot ka filluar të pranojë shumë fëmijë me simptoma të vjelljes, barkqitjes dhe temperaturës, simptoma këto që sipas doktoreshës së ambulancës, Sejlan Murtezani, janë shkak i papastërtisë.

Ajo thotë se që nga çasti i fatkeqësisë ka pranuar gjatë gjithë kohës të lënduar, disa prej të cilëve janë trajtuar aty kurse disa udhëzohen për në spitalin e qytetit përderisa ata vetë punojnë në kushte të jashtëzakonshme, pa rrymë dhe pa ilaçe të mjaftueshme.

Murtezani thotë se nuk janë vizituar nga Ministria e Shëndetësisë dhe nuk kanë marrë asnjë ndihmë tjetër deri tani.