Në pritje të telefonatës historike, Zoran Zaev: Jam i gatshëm të tregoj lidership
Në pritje të telefonatës historike, Zoran Zaev: Jam i gatshëm të tregoj lidership
Lajme
Opinioni vendas dhe ai grek është në pritje të telefonatës historike mes kryeministri, Zoran Zaev, dhe atij grek, Aleksis Cipras, në të cilën pritet të deklarohet dakordimi për pakon e përgatitur nga shefat e diplomacive të dy vendeve përkatëse, me ndërmjetësim të negociatorit Nimic, si dhe të caktohet takimi tet-a-tet për firmosjen e marrëveshjes.
Kryeministri Zaev tha se zgjidhja e kontestit është më afër se kurrë dhe se ai është i gatshëm që të dëshmojë lidership.
“Republika e Maqedonisë kurrë nuk ka qenë më afër gjetjes së një zgjidhjeje të dinjitetshme për kontestin me Republikën e Greqisë, zgjidhje e cila njëkohësisht do të ruajë dhe përforcojë identitetin tonë. Ekziston mundësia për një zgjidhje të tillë për të cilën fjalën e fundit do ta kenë qytetarët e Maqedonisë në referendum. Unë jam i gatshëm që për shtetin tonë sërish të tregoj lidership për të mirën e përbashkët të të gjithë qytetarëve”,- tha kryeministri, Zoran Zaev.
Ivanov kundër “erga omnes”
Në ndërkohë, presidenti, Gjorge Ivanov, ka kërkuar nga kryeministri që t’ia dorëzojë propozimin për bisedime me bazë kushtetuese dhe propozim marrëveshjen.
“Qëndrimi i presidentit Ivanov se nuk pranon zgjidhje për çështjen e emrit për përdorim të përgjithshëm është me bazë dhe parim të pandryshueshëm”, – thuhet në kumtesën e presidentit.
Një ditë para protestës, edhe VMRO-DPMNE në opozitë akuzoi pushtetin se ka nxjerrë në ankand interesat shtetërore.
“Çdo ditë, si në treg, po vihen në ankand dhe po shiten interesat shtetërore dhe kombëtare. Me emrin e shtetit po veprohet sikur të ishte emër i një kompanie të Zaevit, larg nga sytë e opinionit. Deri dje Zaev betohej se nuk ka në plan të ndryshojë kushtetutën dhe emrin kushtetues, që më pas të na bind se “Maqedonia e Ilindenit” i tingëllon bukur”,- tha sekretari i përgjithshëm i VMRO-DPMNE-së, Igor Janushev.
VMRO-DPMNE ka paralajmëruar për të shtunën protestën e madhe para Qeverisë, ndërsa një nga mesazhet e protestës ka të bëjë me çështjen e emrit, duke i cilësuar bisedimet si katastrofale dhe shitje e interesave kombëtare.