Në një kolegj britanik ngritet flamuri kombëtar shqiptar (Foto)
Për nder të 28 Nëntorit, flamuri kombëtar shqiptar ngritet në Kolegjin “John Ruskin” në Croydon të Londrës.
Lajme
Kolegji “John Ruskin”, ku vijojnë mësimin rreth 100 nxënës shqiptarë, siq thotë ambasadori i Kosovës atje Lirim Graiçevci, nderoi duke shënuar 28 Nëntorin, Festën e Flamurit, në bashkëorganizim me shoqatën shqiptare “Shpresa Programme” në Londër.
“Ishte privilegj të merrja pjesë në këtë ceremoni festive, së bashku me atasheun ushtarak në Ambasadën Shqiptare në Londër, Kolonel Ardian Lulaj. Gjithashtu, ishte nder i madh që mu dha rasti ta bëjë ngritjen ceremoniale të flamurit kombëtar shqiptar, në prani të nxënësve dhe stafit mësimor të kolegjit, pas intonimit të himnit shqiptar. Më pas, para nxënësve të tubuar, stafit dhe drejtorit të kolegjit, fola për rëndësinë e kësaj feste për të gjithë shqiptarët kudo në botë. Gjithashtu ishte kënaqësi të bashkëbisedoja me nxënësit shqiptarë si dhe me drejtorin e kolegjit, me të cilin u dakorduam për bashkëpunim në të mirë të nxënësve shqiptarë”, tha ai.
Ai felendëroi shoqatën shqiptare “Shpresa Programme”, e drejtuar nga Luljeta Nuzi, për kontributin për ruajtjen e identitetit dhe gjuhës shqipe në Britani të Madhe.
Kolegji, i cili ishte stolisur me flamuj kombëtar shqiptarë, do të mbajë, sot gjatë tërë ditës, aktivitete kushtuar kësaj feste kombëtare shqiptare./ lajmi.net