Ndërmarrja si term ekonomik përfshin çdo subjekt që ushtron një veprimtari ekonomike. Ndërsa të dhënat për hulumtimin e Open Data Albania, janë marrë nga Regjistri Statistikor për Bizneset në Kosovë. 

Sipas hulumtimit, në vitin 2013 sipas Regjistrit Statistikor për Bizneset rezultojnë 9 358 mikrondërmarrje, 55 ndërmarrje të vogla, 7 të mesme dhe 1 ndërmarrje e madhe. 

“Sipas madhësisë ndërmarrjet në Kosovë klasifikohen në mikrondërmarrje kur kanë 1 deri 9 të punësuar, ndërmarrje të vogla me 10 deri 49 të punësuar, ndërmarrje të mesme 50 deri 249 të punësuar) dhe ndërmarrje të mëdha me mbi 250 të punësuar”, thuhet në njoftimin e kësaj organizate. 

Sipas këtij hulumtimi, del të jetë se gjatë këtij viti, 99.3% e ndërmarrjeve kanë një deri nëntë të punësuar. 

Numri i mikrondërmarrjeve në harkun kohor 2010-2012 ka ardhur duke u rritur, për të pësuar një rënie në vitin 2013 kur regjistrohen 137 mikrondërmarrje më pak se në vitin 2012. 

Nga numri total i ndërmarrjeve në vitin 2013 aktiviteti ekonomik më i preferuar nga investitorët duket të jetë “Tregtia me shumicë e pakicë, riparimi i mjeteve motorike, mallrat personale dhe të amvisërisë” me përkatësisht 2,849 ndërmarrje aktive nga 9,421 gjithsej. 

Sektorë të tjerë të përhapur në Republikën e Kosovës janë: “Pasuritë e patundshme, dhënia me qira dhe aktivitetet e biznesit” me 1,056 ndërmarrje. “Industria përpunuese” me 942 ndërmarrje, “Ndërtimtaria” me 932 ndërmarrje, “Hotelet dhe restorantet” me 909 ndërmarrje etj.