Muhaxhiri: Albin Kurti të sillet si lider, të krijojë kushte për proces normal zgjedhor
Njohësi i çështjeve politike Artan Muhaxhiri, ka thënë se në Vetëvendosje duket se ekzistojnë dy kampe: ai i Albin Kurtit dhe Dardan Molliqajt.
Lajme
“Mirëpo, edhe brenda tyre nuk është krejtësisht mendime të unifikuara”, ka thënë Muhaxhiri në Info Magazine.
“Shpend Ahmeti mund të ketë peshë të madhe në mbizotërimin e njërës palë apo tjetrës, sepse është politikan shumë i rëndësishëm në këtë kontekst”.
“Albin Kurti dhe Shpend Ahmeti dallojnë shumë, sepse Kurti e ka ndërtuar profilin e tij politik në bazë të betejave intelektuale dhe politike me sistemin, me gatishmërinë e vazhdueshme edhe për konfrontime fizike”.
“Shpend Ahmeti është ndryshe. Ai ka ardhur në Vetëvendosje nga FER-i, që e ka përfaqësuar opsionin e një partie të bazuar në elektoratin qytetar”.
“Edhe fitorja e tij në Prishtinë e ka dëshmuar këtë imazh. Ai edhe në hulumtime gjithmonë ka dalë mirë. Për Ahmetin ekziston një simpati edhe në qytetet tjera të Kosovës. Kjo ndodh edhe për arsye se qytetarët mbase e dëshirojnë një Vetëvendosje më të moderuar”.
Muhaxhiri tutje ka thënë se akoma nuk dihet nëse Albin Kurti do të kandidojë për prijës të Vetëvendosjes në zgjedhjet e brendshme të kësaj partie.
“Më e rëndësishmja është që Albin Kurti të sillet si lider dhe të krijojë kushte për një proces normal zgjedhor”.
“Ne të gjithë kemi bërë ironi kur Visar Ymeri ishte kandidati i vetëm për kryetar të Vetëvendosjes – ishte zhgënjyes ai proces zgjedhor për të parin e partisë”.
“Nëse kësaj here Vetëvendosja nuk krijon kushte për zgjedhje normale, padyshim se do të bëhet sikur partitë tjera”.