MSH ndan 30 mijë euro për Florent Hoxhën, të riun që vuan nga leukemia akute

Ministria e Shëndetësisë, përmes një komunikate për media, ka njoftuar se ka mbështetur në vlerë prej 30 mijë eurosh trajtimin mjekësor jashtë vendit, pacientit Florent Hoxha, i prekur nga leukemia akute.

Lajme

11/12/2017 15:26

“Me qëllim të eliminimit të keqinformimit dhe keqpërdorimit nga palë të ndryshme të rasteve që aplikojnë për trajtim jashtë vendit për sëmundjet që nuk mund të trajtohen në tërësi në Kosovë, Ministria e Shëndetësisë informon publikun se, bazuar në legjislacionin në fuqi dhe dokumentacionin mjekësor, të prezantuar me rastin e aplikimit, ka mbështetur në vlerë prej 30 mijë eurove trajtimin mjekësor jashtë vendit të pacientit Florent Hoxha, i prekur nga Leukemia akute”, thuhet në njoftimin e tyre.

Tutje thuhet se i njëjti, ka aplikuar në Ministrinë e Shëndetësisë për trajtim mjekësor jashtë vendit më 6 dhjetor 2017, ndërsa miratimi i trajtimit jashtë vendit dhe fletëzotimi për ta realizuar trajtimin i është lëshuar pas dy dite, më 8 dhjetor 2017.

“Shuma e ndarë është konform kritereve që i parasheh Udhëzimi Administrativ 03/2017 Trajtimi Mjekësor Jashtë Institucioneve Shëndetësore Publike”, thuhet në njoftim.

Krahas kësaj, Ministria e Shëndetësisë ka ofruar për pacientin edhe opsionin e trajtimit falas në Republikën e Turqisë, sipas Marrëveshjes së bashkëpunimit të nënshkruar midis dy shteteve, me të cilën Turqia mbulon falas trajtimin e 100 pacientëve kosovarë në vit, në spitalet publike të këtij shteti.

“Ministria e Shëndetësisë, gjithsesi, respekton të drejtën e pacientit për të zgjedhur spitalin për mjekim”, përfundon njoftimi.