Ylli i Manchester Unitedit, Juan Mata ka bërë të ditur se asnjëherë nuk u njoftua me arsyet pse humbi vendin në Chelsea nga Jose Mourinho.

Pas rikthimit të 51-vjeçarit në Stamford Bridge në verën e vitit të kaluar, spanjolli vuajti të sigurojë vend në formacionin bazë dhe bëri vetëm 13 paraqitje në Premierligë, para transferimit në Old Trafford në fund të janarit.

Mata u zgjodh futbollisti më i mirë i vitit në Chelsea për dy sezone me radhë para ardhjes së Mourinhos dhe ai ka theksuar se nuk i di arsyet pse mbeti i injoruar.

“Jo. Asnjëherë nuk më ka njoftuar”, deklaroi Mata për The Guardian.

“Kur luaja, luaja. Ai më jepte instruksionet e tij. Ka trajnerë që japin shpjegime por ka edhe të atillë që nuk mendojnë se është e nevojshme. Kjo është e tëra”, u shpreh ai.