Sezonin e fundit e mbylli si titullar, por atë të riun do ta nisë si rezervist.

Madje, lehtë mund të ndodh që të largohet nga klubi, duke u huazuar te ndonjë skuadër ku mund të gjejë hapësirë më të madhe për lojë.

E kuptuat, bëhet fjalë për portierin kosovar Etrit Berisha i cili menjëherë në edicionin e tij të parë si anëtar i Lazios ia zuri vendin të mirënjohurit Federico Marchetti.

Mirëpo, sipas njoftimeve të fundit nga mediet italiane, kërkesa e madhe e presidentit Claudio Lotito prej 10 milionë eurosh për Marchettin është duke e pamundësuar shitjen e tij gjatë afatit kalimtar të verës.

Dhe, kjo duket se do ta rikthejë atë në statusin e titullarit, lajm shumë i keq për Berishën për të cilin thuhet se mund të huazohet në ndonjë skuadër tjetër.

Mirëpo, reprezentuesi i Shqipërisë ende rrezikon të suspendohet pas akuzave se nënshkroi dy kontrata të vlefshme, së pari me Chievon e pastaj edhe me Lazion, kur u transferua në Olimpico në verën e vitit të kaluar nga Kalmar.