Dokumenti i ligjit për zgjedhjet e përgjithshme ditë më parë është kthyer nga Qeveria në Kuvend, ndërsa komisioni përkatës pritet që të hënën të japë rekomandimin përfundimtar.

Votimi i parë i këtij ligji ka pasur të bëhet të enjten e kaluar, por për shkak të mungesës së kuorumit në mbledhjen e Komisionit për Legjislacion, ka qenë e pamundur që të procedohet tutje, shkruan gazeta “Tribuna”.

Për mbledhjen e radhës, kryetari i Komisionit për Legjislacion , deputeti i LDK-së Arben Gashi, shprehet i bindur se mekanizimi që drejton do të ketë kuorum të mjaftueshëm dhe ligji do të procedohet.

“Të hënën do të mblidhemi në ora 10:00 dhe besoj se do të kemi kuorum të mjaftueshëm pasi katër deputetë do të kthehen nga udhëtimet zyrtare dhe do ta miratojmë ligjin”, ka thënë Gashi, për gazetën “Tribuna”.

Ai ka bërë të ditur se me t’u miratuar në komision, dokumenti do t’i dorëzohet për rend dite kryesisë, por edhe nëse kjo e fundit nuk e bën një gjë të tillë, atëherë këtë sipas tij do ta bëjë seanca.

“Gjithsesi të enjten e ardhshme Ligji për zgjedhjet e përgjithshme do të jetë në diskutim, pavarësisht nëse e fut apo jo në rend dite Kryesia e Kuvendit”.