LDK dhe VV kategorik kundër koalicionit me PDK-në
Pas Shpërbërjes së Kuvendit të Kosovës, përfaqësues të Vetëvendosjes dhe LDK-së kanë thënë se e mohojnë absolutisht ndonjë mundësi për koalicion me PDK-në. Nëse ndodhë ashtu, edhe Florin Kelmendi e edhe Xhafer Tahiri do të braktisin partitë e tyre.
Lajme
Deputetët Florin Krasniqi nga Vetëvendosje dhe Xhafer Tahiri nga LDK kanë akuzuar njëri tjetrin për afërsi me PDK-në.
Kështu, ata kanë bartur debatin e zhvilluar gjatë seancës së sotshme në Kuvend, për flirtim me Qeverinë Thaçi në studion e emisionit \”Info Magazine\” në Klan Kosova. Madje, Krasniqi ka thënë se mocioni i mosbesimit i LDK-së ka qenë nga vetë PDK-ja.
“Ne nuk kemi një program të përbashkët me LDK-në. LDK mendon se duhet të shkarkohet Parlamenti. Ne mendojmë se duhet shkarkuar Qeveria. Ne mendojmë se e kemi argumentuar shumë mirë faktin që duhet të shkarkohet Qeveria, nga dita e parë”.
“Kjo ka treguar se PDK dhe LDK kanë punuar bashkë në këtë drejtim. Ne do ta mbështesnim mocionin e LDK-së, por ai ka qenë i PDK-së. Kush e ka shkruar këtë mocion?”.
“Momentin kur Vetëvendosja do të bëhet pjesë e qeverisjes me PDK-në, Florin Krasniqi do të jep dorëheqje”, ka thënë ai.
Në anën tjetër, Xhafer Tahiri ka thënë se qëllimi i LDK-së është arritur sot, me shkarkimin e Kuvendit dhe shkuarjen në zgjedhje parlamentare në mesqershorin e këtij viti.
“As opozita nuk i ka pasur numrat që ta shkarkojë Qeverinë e Kosovës. Për LDK-në çdo minutë i qeverisjes së Thaçit ka qenë i tepërt”.
“LDK si parti udhëheqëse opozitare ka zgjedhur këtë mekanizëm për shpërndarjen e Kuvendit dhe shkuarjen në zgjedhje në Qershor”.
“Kjo është e arritur e gjithë opozitës, sepse ne kemi shkurtuar mandatin. Nuk na duhet një Kuvend i cili është përdorur çdo ditë nga zoti Thaçi i cili çdo ditë ka punuar për të legjitimuar veprimet e veta”.
“Nuk ka të bëjë me ndonjë koalicion midis PDK-së dhe VV-së. Absolutisht, Xhafer Tahiri nuk do të jetë pjesë e një koalicioni të LDK-së me PDK-në”.
“PDK duhet të shkojë në opozitë, duhet t’i lajë gjynahet e këtij mandate, duhet ky vend përfundimisht t’i kthehet normalitetit”, ka thënë ai në “InfoMagazine”.