Sipas asamblistëve të LDK-së, deklaratat e Shpend Ahmetit, kryetarit të Prishtinës lidhur me këtë çështje janë deklarata mashtruese për opinionin publik.

“Grupi i LDK-së në Kuvendin e Prishtinës konsideron se deklarata e kreut të Komunës lidhur me garancionin shtetëror të Qeverisë së Republikës së Kosovës për kredinë e BERZH-it për blerjen e autobusëve për Trafikun Urban, është deklaratë mashtruese ndaj opinionit publik. Kjo është edhe një përpjekje e udhëheqjes së Prishtinës për të mbuluar moszbtatimin e ligjit, neglizhencën e saj në zbatimin e procedurave ligjore lidhur me marrëveshjet ndërkombëtare”, thuhet në reagimin e Grupit.

Po ashtu, Grupi konsideron se me letra në dorë para medieve, duke e thënë të pavërtetën për çështjen e garancionit shtetëror nuk mund të arrihet asnjë efekt, madje as efekte propaganduese.

“Ngecja e zhvillimit të Prishtinës nuk mbulohet me asfare propagande politike, destruktive dhe nxitëse-përjashtuese”, thuhet tutje.

Në këtë reagim thuhet po ashtu se Grupi konsideron se kërkesa e Komunës për garancionin e shtetit drejtuar Ministrisë së Financave të Qeverisë së Republikës së Kosovës duhet të kalojë për aprovim në Kuvendin e Komunës, që të jetë kërkesë e qytetarëve, nëpërmjet të të zgjedhurve të tyre, ashtu siç e thotë ligji.

“Në të gjitha rastet e ngjashme është vepruar në këtë formë, gjë që nuk po e bën udhëheqja aktuale e Komunës. Grupi pret që kërkesa për garancionin e shtetit për kredinë nga BERZH-i, për blerjen e 51 autobusëve, drejtuar Ministrisë së Financave dhe Qeverisë së Republikës së Kosovës, të procesohet sipas Ligjit në fuqi.” /kp