Buxheti familjar në Kosovë në muajin tetor ngarkohet tej mase. Gjatë muajit tetor qytetarët e Kosovës bëjnë edhe përgatitjet për dimër si turshitë, ajvarin dhe blerjen e drunjve për ngrohje, etj.

Qytetarët e Prishtinës në rubrikën tonë të përditshme “LajmiVOX” thonë se muajt gjatë stinës së vjeshtës, janë më të papërballueshmit për tërë vitin, për shkak të shpenzimeve në përgatitjen e ushqimeve për dimër dhe njëkohësisht dhe sigurimin e druve, si lëndë djegëse për ngrohje.

Kostoja e lartë e çmimit të energjisë elektrike, si dhe druve për ngrohje gjatë sezonit të dimrit është vështirë e përballueshme për qytetarët.

Çmimet e druve në treg sillën për një metër 40 deri 50 euro.

“ Unë i kam bërë të gjitha përgatitjet. Çmimi i drurëve nuk është i larte në krahasim se çka heqin ata të shkret për me i marr ato dru”, tha një qytetar.

“ Tash ka filluar ftohti unë i kam marr do dru  pak po presim nxehjen qendrore.  Çmimi është i lartë”, tha njëri qytetar

“Unë ende si kam ble drutë. Shtrenjtë është shumë çmimi i drurëve”, u shpreh njëri qytetar.

“Me 75 euro qysh mu bë gati për dimër. Ne nxehmi me dru, pak kam ble do dru”, tha një qytetar.

“ Unë jetoj në banesë dhe me rrym nxehem. Për dimër gruaja ka ba gati turshitë e gjerat ushqimore”, tha njëri qytetar. /Lajmi.net/