Raportuesi publik i Gjykatës Administrative të Besançon në Francë ka ardhur në përfundim se kërkesa e familjes së 15 vjeçares Leonarda Dibrani për t’iu dhënë një leje për qëndrim në Francë duhet të refuzohet.

Seanca dëgjimore  për këtë rast është hapur sot në orën 9 të mëngjesit në prani të avokatëve të palëve, por në mungesë të familjes Dibrani, e cila është kthyer në Kosovë në tetor të vitit të kaluar.

“Emocioni që nxiti ky rast është në përpjesëtim me kompleksitetin efektiv ligjor”, ka nënvizuar raportuesi publik, Jerome Charret.

Përzënia e koleges rome në Kosovë në muajin teteor të vitit të kaluar, e cila ishte ndaluar gjatë një ekskursioni shkollor, kishte nxitur shumë polemika e protesta nga nxënësit në shkollat e Francës.

Gjykata ka gjykuar vetëm legalitetin e refuzimit të lejes së qëndrimit e cila nënkuptonte detyrimin për ta lëshuar territorin francez”, ka thënë gjykatësi i ngarkuar për t’i propozuar gjykatës nj zgjidhje të rastit.

Sipas këtij gjykatësi, çifti jetonte i mbyllur dhe dilte jashtë vetëm kur ishte koha për t’i marrë ndihmat.

“Vullneti për integrim profesional i z. Dibrani mbetet shumë shumë i kufizuar dhe zonja Dibrani nuk flet frëngjisht”, ka vlerësuar ai.

Prindërit e Leonarda Dibranit kërkonin që të përfitonin nj leje qëndrimi “private e familjare. Ata kanë kërkuar anulimin e detyrimit për të lëshuar territorin francez, i shqiptuar ndaj tyre nga Prefekti i Doubs më 19 qershor 2013. Vendimi i Gjykatës duhet të merret më 28 janar dhe palët edhe më tej kanë të drejtë ankese ndaj tij.

Deri më tani, të gjitha kërkesat e çiftit Dibrani për të marrë një leje qëndrimi në Francë janë hedhur poshtë. Gjatë një seance të re të dëgjimit, avokatja e familjes Brigitte Bertin ka thënë se gjashtë fëmijët e çiftit Dibrani kanë lindur në Itali dhe një në Francë, e jo në Kosovë, ku ata tashmë janë kthyer.

Kur ishin kthyer në Kosovë, Reshat Dibrani, babai i Leonardës, kishte pranuar se kishin qenë të detyruar të gënjejnë për origjinën e familjes me qëllim që të pranoheshin të qëndrojnë në Francë.