Kuvendi: Gazetarëve nuk u lejohet qasja tek Zyra e Kryetarit të Kuvendit pa ftesë

Kuvendi i Kosovës ka reaguar më një sqarim lidhur me largimin e gazetarit nga ambientit të Kuvendit, i cili kishte shkuar tek zyra e kryeparlamnetarit për të përcjellë një takim që po mbahej, me shefat e grupeve parlamentare.

Lajme

22/02/2018 15:40

Në sqarimin e Kuvendit thuhet se pa ftesë paraprake për mediat nuk lejohet qasje në hapësirën e Zyrës së Kryetarit të Kuvendit.

Po ashtu Kuvendi thotë se gazetari është larguar nga sigurimi i Kuvendit, e jo nga ai i Kadri Veselit.

Lexo edhe

Sigurimi i Kuvendit tërheq zvarrë një gazetar

Njoftimi i plot i Kuvendit:

Kuvendi i Kosovës dëshiron të sqarojë rreth raportimit se sot një gazetar ‘është larguar me forcë nga ambientet e Kuvendit’.

Sikur edhe në çdo seancë tjetër, gazetarët qëndrojnë në hollin e Kuvendit, dhe në hapësirat e dedikuara për ta, pas sallës së mbledhjeve plenare. Ndërkaq, në lozhën e sallës ku mbahen seancat qëndrojnë kameramanët dhe fotoreporterët.

Në çdo hapësirë tjetër të Kuvendit, çfarëdo zyre, në këtë rast edhe Zyra e Kryetarit të Kuvendit, nuk lejohet qasja kur nuk ka ftesë zyrtare dërguar për media apo takim të paracaktuar me kabinetin.

Pra, në një rrethanë të tillë, mediat nuk mund të kenë qasje në zyrat tjera, pa ftesë apo leje paraprake. Po ashtu, dëshirojmë të theksojmë se nuk ka qenë ‘sigurimi i kryetarit Veseli’ siç thuhet në raportime, që e ka larguar, por sigurimi i Kuvendit, që i përgjigjet Policisë së Kosovës. Për këtë ne kemi kërkuar edhe një raport nga Policia e Kosovës, të cilin e gjeni të bashkëngjitur.

Kuvendi i Kosovës mbetet i përkushtuar që të krijojë kushte sa më të mira për gazetarët dhe qasje sa më të madhe për kryerjen e detyrës së tyre. Por, po ashtu, gjithnjë në kuadër të bashkëpunimit, kërkojmë nga ta të respektojnë procedurat e parapara në Kuvend, ashtu siç ndodhë në çdo vend tjetër të botës./Lajmi.net/