Kushtrim Bajraktaraj në “Top-10” bodybuilderët e Evropës
Në fillim të muajit maj është mbajtur Kampionati Evropian në Santa Suzana të Spanjës, ku pjesëmarrës ishte edhe bodybuilderi nga Kosova, Kushtrim Bajraktaraj.
Sport
Në garën ku morën pjesë 46 shtete të Evropës me gjithsej 1200 garues, Bajraktaraj pati një plasman fantastik duke u renditur në pozitën e 7-të, në mesin e 26 konkurrentëve, që të gjithë kampionë të shteteve pjesëmarrëse.
Ai është kampion i shumëfishtë në Kosovë për vite me radhë. Në vitin 2014 u shpall kampion absolut mbarëkombëtar, gjë që e dërgoi Kushtrimin në një nivel shumë më të lartë.
Po ashtu, në tetor të vitit 2015, Kushtrimi ishte garues në Kampionatin “Euro Amateur Olimpia 2015” që u mbajt në Pragë të Çekisë, ku u stolis me medalje të argjendtë dhe njëkohësisht u bë shqiptari i parë që posedon medalje në IFBB.
Kushtrimi, i cili gjithashtu është trajner personal shumë i dalluar në Kosovë, falënderoj Federatën e Bodybuildingut dhe Fitnesit në Kosovë, që i ka mundësuar pjesëmarrjen në këto gara evropian dhe botërore, në Federatën më të fuqishme në botë, “International Federation of Bodybuilding”.