Kreu i Lëvizjes Vetëvendosjes, Albin Kurti duke uruar Shqipërinë për marrjen e statusit kandidat për anëtarësim në BE, tha se Shqipëria duhet ta bëjë një gjë të tillë para Serbisë.

E për të ndodhë një gjë e tillë sipas Kurtit, Kosova, nuk duhet ta lejojë Serbinë që të anëtarësohet në BE, para Shqipërisë, raporton KosovaPress.

Kurti i cili ishte i ftuar në Tiranë për të marrë pjesë në aktivitetin përmbyllës të Javës dhe Kulturës Çame, ka folur për krijimin e shtetit të fuqishëm shqiptar për të larguar në këtë mënyrë orekset e shteteve shoviniste ndaj Shqipërisë.

“Të gjithë u gëzuam që Shqipëria e fitoi statusin e vendit kandidat për në BE, Shqipëria duhet ta ndihmojë Kosovën në integrimet evropiane mirëpo edhe Kosova duhet ta ndihmojë Shqipërinë, për tu bërë anëtare e plotë në Bashkimin Europian”.

“Ndihma që Kosova t’i jap Shqipërisë është që të mos lejojë që Serbia të bëhet anëtare e BE para Shqipërisë. Ju e dini që Greqia e kushtëzon Maqedoninë, por kushtet që Greqia ja vendosë Maqedonisë nuk krahasohen me kushtet që Serbia do i vendosë Shqipërisë dhe Kosovës nëse anëtarësohet para nesh në BE”.

“Shqiptarët janë gjuhë shqipe, ndërsa grekët dhe serbët janë shtete ekspansioniste, dhe kjo nuk ka ndryshuar për 170 vjet, e nuk do të ndryshojë vetvetiu, deri sa shqiptarët të ngrihen e të krijojnë shtete të fuqishme, duke zmbrapsur orekset e shteteve shoviniste serbe e greke. Ndaj neve na takon që Çamërinë ta trajtojmë siç është dhe siç duhet të jetë gjithmonë pjesë e çështjes tonë kombëtare. Çështja çame është pjesë e tërësisë dhe ka nevojë për vëmendjen e të gjithë neve, pavarësisht prej nga vijmë në trojet tona në Ballkan”, tha Kurti.

(KosovaPress)