Kumanova sot, çka tash?
Nata në Kumanovë ka kaluar e qetë, por paqartësia rreth gjithë asaj që ka ndodhur, vazhdojnë të ngrehin shumë dilema se nga po shkon Maqedonia.
Lajme
Lufta 48 orësh mes policisë së Maqedonisë dhe një grupi të armatosur që e quan veten “Ushtria Çlirimtare Kombëtare”, ku mbetën të vrarë tetë policë dhe 14 pjesëtarë të kësaj ushtrie, ka bërë brenda popullatës të mbretërojë frika e inskenimit të një lufte të re ndëretnike midis shqiptarëve dhe maqedonasve.
Sipas analistëve, pavarësisht nëpërkëmbjes dhe pabarazisë me maqedonasit, shqiptarëve nuk iu konvenon një luftë e re në Maqedoni, ndërsa vlerësohet se përfitues i vetëm i këtij incidenti është kryeministri ultranacionalist, Nkolla Gruevski.
Ky i fundit, i cili po mbush gati nj dekadë në pushtet, me një sistem qeverisje të korruptuar, po përballet me protesta të opozitës për largim nga pushteti, prandaj disa analistë, shqiptarë e maqedonas, vlerësojnë se situata si ajo që ndodhi në Kumanovë mund të jenë të inskenuara prej regjimit të tij.
Mbrëmë në Lagjen e Trimave, ku ndodhi lufta, banorët janë rikthyer në shtëpitë e tyre, por se cila është gjendja aty, gazetari Fatos Bytyçi ka edituar disa fotografi në profilin e tij në Facebook.
Ndërkohë në rrjetin social në Youtube është postuar një video, ku një shqiptar nga Kumanova kritikon regjimin e Gruevskit dhe udhëheqësit shqiptarë për tensionim të situatës, politikë kjo që sipas tij çon deri tek një luftë e re ndëretnike, për të cilën nuk janë të interesuar as shqiptarët dhe as maqedonasit.