Këshilli i Sigurimit në mënyrë unanime i rriti sanksionet dje ndaj Koresë Veriore për shkak të testit të gjashtë dhe më të fuqishmit bërthamor, duke vendosur ndalesë ndaj eksporteve të saj të tekstilit dhe duke kufizuar importet e naftës së papërpunuar, transmeton Express.

“Delegacioni im e dënon në mënyrë më të fuqishme dhe kategorikisht e refuzon rezolutën e fundit dhe të jashtëligjshme të Këshillit të Sigurimit të OKB-së”, ka thënë ambasadori i Penianit, Han Tae Song, në Konferencën për Carmatim të sponsorizuar nga OKB-ja në Gjenevë.

Po ashtu, ai e ka kërcënuar ashpër edhe SHBA-në.

“Republika e Koresë e Popullit Demokratik (DPRK) është e gatshme ta përdorë një formë të mjeteve të skajshme”, ka thënë Han pa shpjeguar.

Por, ai ka shtuar: “Masat e ardhshme nga DPRK do ta bëjnë SHBA-në të përjetojë dhembjen më të madhe që e ka përjetuar ndonjëherë në historinë e vet”.