Konfliktet në Siri e Irak, Kryeministri i krahason me opozitën kosovare

Kryeministri Isa Mustafa, fiks në orën 7 e 30 të mëngjesit të sotëm, punën e parë që ka bërë, ka shkruar e publikuar një qëndrim të tij në Facebook. Sipas kryeministrit, bota po kalon një periudhë të luftërave dhe krizave shumë shqetësuese.

Lajme

25/08/2016 08:46

“Omar Daqnesh, një djalosh katërvjeçar sirian i nxjerrë nga rrënojat e bombardimeve, këto ditë ishte pamja tragjike e botës së sotme”, shkruan kryeministri.

Ai më pas thekson se janë  miliona refugjatë nga Siria, Iraku, Afganistani, Libia.

“Sulmet ruse në Ukrainë dhe pushtimi i Krimesë- një vendi Sovran. Aktet terroriste në Francë, Belgjikë, Turqi. Tentim grusht shteti në Turqi me shumë viktima në njerëz. Nuk janë këto vetëm lajme dhe pamje të rënda, por janë realiteti në të cilin po jetojmë”.

E kështu pasi i bie rreth e rrotull globit, kryeministri flet për zhvillimet në Kosovë.

Sipas kryeministrit,  edhe realiteti ynë për një kohë të gjatë, për fat të keq, zë lajmet botërore me gazin lotsjellës në Sallën e Parlamentit, me sulmet me shishe molotovi dhe gurë në ndërtesat qeveritare e shtëpi private, me hedhje të bombave në shtëpi private dhe Televizionin publik, me gjuajtje me armë të rënda në ndërtesën e Parlamentit, por edhe me pamjet nga selia e VV e mbushur me maska, shishe molotovi, sfera të qelqta dhe objekte tjera të rrezikshme.

“Të çdoditshme janë kërcënimet e njerëzve nga opozita se do të veprojnë dhunshëm nëse vazhdohet me procese demokratike të shtetndërtimit të vendit tonë”.

“Në krejt këtë situatë po e shohim se edhe njerëzit tanë po e sulmojnë shtetin e tyre, por nuk duhet të kemi iluzione se edhe dikush tjetër s’mund të shfrytëzojë këto kërcënime”.

Kryeministri deklaron se nëse jo të tjerët, Kosova ka të freskët kujtesën për shumë e shumë fëmijë tanë, moshatarë të Omarit, për një milion të përzënë nga shtëpitë e tyre.

“Për shkatërrimet e pronave dhe shtëpive, për dhunimet, masakrimet e popullatës civile”.

“E kemi të freskët edhe kujtesën për përkrahjen e Shteteve të Bashkuara të Amerikës dhe komunitetit ndërkombëtar për të shpëtuar nga gjenocidi dhe zhbërja”, deklaron ai.

“Kosova e ka përjetuar tmerrin e dhunës dhe nuk përkrah dhunën. Kosova ka pasur fatin që në momentet më të vështira i kanë dalë në krah SHBA-të dhe komuniteti ndërkombëtar”.

Kryeministri Mustafa shprehet se këtë fat nuk do ta kemi përherë. “Prandaj askush nuk ka nevojë të matë patkoin e atij që nuk i bie për këmbe. Trimat nuk janë për të kërcënuar vendin e tyre, por për ti dalë në krah këtij vendi”.