Komunat kanë filluar t’i përgjigjen kërkesës së kryeministrit Ramush Haradinaj, për përgatitjen e projekteve me të cilat do të paraqiten për grante të institucioneve financiare ndërkombëtare. Bekim Dobra, zëdhënës i Komunës së Drenasit, thotë se do të aplikojnë me tri projekte, por me prioritet, sipas tij, do të jetë projekti për rregullimin e Lumit Drenica, i cili është në gjendje të keqe.

“Ne, si Komunë e Drenasit kemi menduar të aplikojmë me tri projekte, njëri nga projektet është edhe kolektorët e Lumit Drenica me tri degëzimet e saj, që vlera e tij kap mbi 2 milionë euro. Ne shpresojmë që ky projekt të jetësohet nga donatorët, sepse është në interes jetik të qytetarëve të Drenasit dhe për mirëmbajtjen e Lumit Drenica, i cili nuk është në gjendje të mirë”, deklaroi Dobra.

Donjeta Gashi, nga Zyra për Informim e kryeministrit, tha se ende janë  në fazën e mbledhjes dhe klasifikimit të projekteve nëpër komuna. Sipas saj, deri tani kanë identifikuar disa projekte të tilla.

“Po i përmendim vetëm disa nga to, që janë:  Unaza e jashtme e Prishtinës dhe kolektori kryesor për pastrimin e ujërave të zeza në Suharekë. Takimi do të mbahet me 26 shkurt, 2018, në Londër, dhe deri atëherë të gjitha komunat e interesuara por edhe bizneset private, janë të ftuar që t’i prezantojnë projektet e tyre”, tha Gashi.

Sipas Zyrës së kryeministrit Haradinaj, Banka Evropiane për Rindërtim dhe Zhvillim ka ofruar investime në infrastrukturë në Kosovë. Afati për dorëzimin e projekteve të komunave në qeveri është java e parë e shkurtit. Pas kësaj, Qeveria do t’i paraqesë ato te Banka në takimin e 26 shkurtit, në Londër, transmeton RTKlive.