Komuna e Deçanit ndërton rrugën deri te uji mineral në zonën e Manastirit
Komuna e Deçanit do të ketë qasje për herë të parë pas luftës për të investuar brenda zonës së mbrojtur të Manastirit të Deçanit.
Lajme
Për këtë të mërkurën kanë nënshkruar marrëveshjen kreu i Komunës, Rasim Selmanaj, komandanti i KFOR-it, gjeneral-majori Francesco Paolo Figliuolo, komandanti i MNBG-W, kolonel Angelo Minelli, si dhe kryemurgu i Manastirit, Ati Sava Janjiq, raporton KosovaPress.
Në bazë të kësaj marrëveshje do të bëhet fillimi i punimeve për renovimin e një rruge tashmë ekzistuese brenda Zonës së Mbrojtur, prapa Manastirit.
Nënshkrimi është bërë në kampin “Villaggio Italia”, selinë e Grupit Shumëkombësh Luftarak Perëndim (MNBG-W).
Pas Marrëveshjes, punët që do të kryhen nga Grupi i Përbashkët për Mbështetje Logjistike (njësiti shumëkombësh mbështetës i KFOR-it), në sajë të mjeteve nga një program italian, do të sanohet dhe aftësohet rruga.
Sipas një njoftimi të KFOR-it, ky projekt, i cili nuk ka ndonjë ndikim negativ në mënyrën e jetës së murgjve në Manastir ose në mjedis, do të ofrojë më shumë siguri për qytetarët të cilët shpesh vizitojnë aty pranë burimin e ujit mineral. që besohet të ketë cilësi shëruese.
Sipas këtij njoftimi, marrëveshja pasqyron rëndësinë simbolike të aktit mes dy homologëve – që përfaqësojnë komunitetin shqiptar dhe atë serb – që në pajtim me Ligjin e Kosovës për Zonat e Veçanta të Mbrojtura të datës 20 tetor 2008, kanë mirëpritur, për qytetarët e tyre propozimin e bërë nga MNBG-W, i udhëhequr nga regjimenti italian “Lancieri di Montebello”.