Kërkohet armëpushim në Gaza
Presidenti i Shteteve të Bashkuara, Barack Obama, i ka thënë kryeministrit të Izraelit, Benjamin Netanyahu, se sekretari amerikan i shtetit, John Kerry, do të udhëtojë së shpejti në Kajro, për të kërkuar ndërprerjen e luftimeve në Rripin e Gazës midis izraelitëve dhe palestinezëve.
Bota
Në deklaratën e Shtëpisë së Bardhë nuk saktësohet se kur do të ndodhë udhëtimi.
Sipas transkriptit të bisedës, Obama ka shprehur shqetësime serioze për rritjen e numrit të viktimave, përfshirë vdekjet e civilëve palestinezë dhe humbjen e ushtarëve izraelitë, raporton RFE.
Biseda ka qenë e dyta në tre ditë midis Obamës dhe Netanyahut.
Edhe Këshilli i Sigurimit i Kombeve të Bashkuara ka shprehur shqetësim për rritjen e numrit të viktimave në Rripin e Gazës dhe ka bërë thirrje për fund të armiqësive.
Takimi urgjent është mbajtur pasi sekretari i përgjithshëm i OKB-së, Ban Ki-moon, ka thënë se vrasja e palestinezëve nga sulmet izraelite është “veprim mizor”.
Duke folur në Katar, Ban po ashtu ka kërkuar ndalimin e menjëhershëm të luftimeve që kanë marrë mbi 400 jetë njerëzish.
Mbi 60 palestinezë dhe 13 ushtarë izraelitë janë vrarë të dielën, ditën më të përgjakshme në ofensivën 13-ditëshe.