Agjencitë serbe të informimit njoftojnë se takimi është zhvilluar mbrëmë ndërmjet kryetarit të të ashtuquajturës Zyrë për Kosovën në qeverinë e Serbisë, Marko Gjuriq, kryetarit të Mitrovicës së veriut, Goran Rakiq, atij të Leposaviqit, Dragan Jabllanoviq, të Zveçanit, Vuçina Jankoviq dhe kryetarit të Zubin Potokut, Stevan Vulloviq.

 \”Pjesëmarrja në këto zgjedhje është një formë e betejës politike, e përshtatur me rrethanat, kurse mbështetja për përfaqësuesit serb dhe për Serbinë, është detyrim patriotik i secilit qytetar të Serbisë në rajonin e krahinës”, thuhet në komunikatën e lëshuar pas takimit, raporton Radio Evropa e Lirë.

 Përfaqësuesit e komunitetit serb në Kosovë ishin kërcënuar me bojkotim të zgjedhjeve parlamentare në Kosovë, të cilat mbahen të dielën më 8 qershor, duke kundërshtuar simbolet e shtetësisë së Kosovës në fletëvotime dhe material zgjedhor.

\”Duke punuar në institucionet e përkohshme qeverisëse dhe me vazhdimin e bisedimeve do t’i largojmë çdo ditë e më shumë separatistët në Prishtinë që të realizojnë synimet e tyre, kurse pozicionin tonë të negociimit do ta fuqizojmë gjithnjë e më shumë”, citohen të kenë thënë pjesëmarrësit në takim.