Vendimin e Zejnullahut e kanë gjykuar për antiligjor dhe antikushtetues, shkruan sot Koha Ditore.

Ankesa është firmosur nga Enver Hasani, kryetar i Gjykatës Kushtetuese, Arsim Bajrami, ministër i Arsimit, Haki Demolli, ministër i Forcës së Sigurisë, si dhe Hajredin Kuçi, ministër i Drejtësisë.

Firmat i kanë vënë vetëm në kapacitetin e profesorit. Të katërtit janë profesorë të rregullt në Juridik, gradë kjo më e larta akademike që jep Universiteti i Prishtinës.

“Gjendja, pozita dhe statusi i profesorëve të rregullt nuk guxon dhe nuk mund të ndryshohet njëanshëm me akte individuale të organeve të Universitetit”, thuhet në ankesën që është përcjellë në Dekanatin e Juridikut dhe përmes tij në Rektorat.

“Kjo paraqet cenim të parimeve kushtetuese mbi sundimin e ligjit dhe sigurinë juridike, si dhe cenim të të drejtave kushtetuese mbi lirinë e artit e shkencës (neni 48 i Kushtetutës), si dhe të drejtën e punës dhe ushtrimit të profesionit (neni 49 i Kushtetutës)”, shkruan ankesa.