Policia e Kosovës raporton se një person ka kërcënuar me armë një person tjetër në hyrje të Qendrës Klinike Universitare të Kosovës, në Prishtinë.

“Një i dyshuar mashkull, shqiptar i Kosovës, pas një mosmarrëveshje verbale ka kanosur me armë një mashkull gjithashtu shqiptar, shtetas i Kosovës”.

“Rasti ka ndodhur në hyrje të spitalit duke rrezikuar edhe qytetarë tjerë të rastit. Nga i dyshuari është konfiskuar arma e llojit Zastava  7.65 mm. Në konsultim me prokurorin të dyshuarit pas inicimit të rastit janë liruar, rasti vazhdon në procedurë të rregullt”, ka thënë Policia e Kosovës.

Në 24 orëshin e fundit, sipas Policisë, një person nga Prishtina është dërguar në mbajtje pasi te ai është gjetur në posedim një armë AK 47 dhe 27 fishekë gjatë një kontrolli që i ishte bërë shtëpisë së tij.

Në një rast tjetër, gjithashtu në Prishtinë, një mashkull është arrestuar dhe dërguar në mbajtje pasi që i njëjti e kishte kërcënuar viktimën duke i kërkuar dy prona.