Ka filluar takimi në mes të bllokut opozitar dhe VV-së
Sot pasdite pritet të mbahet takimi në mes të tri partive të bllokut opozitar dhe Lëvizjes Vetëvendosje.
Lajme
(E plotësuar)
Sapo ka filluar takimi në mes të liderëve të partive opozitare në selinë e AAK-së.
Kreu i Lëvizjes Vetëvendosje, Albin Kurti, ai i LDK-së, Isa Mustafa dhe lideri i Nismës për Kosovën, Fatmir Limaj janë duke marrë pjesë në këtë takim, i cili është në vazhdën e takimeve të opozitës, të cilët po mëtojnë t’i përafrojnë qëndrimet në mes të bllokut opozitar dhe Vetëvendosjes, sa i përket çështjeve të dialogut dhe privatizimit.
Blloku opozitar dhe VV në katër te AAK-ja
Liderët e partive të bllokut opozitar LDK-AAK-Nisma dhe Vetëvendosje, do të takohen sot në orën katër në selinë e AAK-së.
Kështu tha për lajmi.net, zëdhënësi i Lëvizjes Vetëvendosje, Erzen Vraniqi.
“Kryetari i Lëvizjes Vetëvendosje, Albin Kurti do të takohet sot në orën katër në selinë e AAK-së”, tha Vraniqi.
Ky takim është vazhdim i atyre të më hershmëve, ku është diskutuar për afrimin e qëndrimeve të bllokut opozitar dhe VV-së, sa i përket dialogut dhe privatizimit.
Ndërkohë, në takimin e sotëm, pritet të diskutohet edhe për mundësinë e nënshkrimit të një marrëveshje në mes të këtyre katër subjekteve politike.