Kryetari i Komisionit Qeveritar për njohje dhe verifikimin e statusit të dëshmorit, invalidit, veteranit, pjesëtarit dhe të internuarit të luftës së UÇK-së, Agim Çeku thotë se listat janë transparente dhe nuk përjashtohen ankesat për emra konkret.

Ai tha se procesi është duke shkuar ngadalë por është në përfundim e sipër.

“Listat fillestare mendojmë që deri kah fundi i javës së ardhshme do të publikohen. Pastaj është afati i ankesave dhe ne do ta trajtojmë, do ta shqyrtojmë çdo ankesë dhe atëherë komisioni do ti publikojë listat përfundimtare. Pas listave përfundimtare prapë ekzistojnë instrumente, në qoftë se prapë ndonjë aplikant nuk është i kënaqur apo mendon se ju ka bërë e padrejtë, atëherë duhet të drejtohen në gjykatat themelore dhe me fakte, me argumente dhe gjykata e merr lëndën në dorë dhe atëherë jep përgjegjësi para gjykatës. Ose ai që ia ka përcaktuar një status të tillë, nëse ka gabuar, ose veterani nëse ka dhënë të dhëna të rrejshme dhe pretendon që të përfitojë”, tha Çeku për RTK.

Sa i përket numrit të emrave të përfshirë në lista, Çeku nuk ka dashur të flasë për shifrën përfundimtare, duke theksuar duhet të kenë besim që komisioni do ta përfundojmë këtë proces ashtu siç duhet.

“Nuk besoj se listat do të nënshkruhen nga komandantët edhe pse ata e kanë obligim moral. Ne si anëtarë komisioni nuk kemi mekanizma e instrumente që ta detyrojmë dikë që të nënshkruajë. Kjo varet nga vetë vullneti i tyre dhe përgjegjësia morale komanduese që e kanë pasur dhe ata janë komandantët e tyre, që i njohin ushtarin veteranin aplikant”, tha ai.

Ndërkohë, veteranët kohë pas kohe janë shprehur të zhgënjyer me përkujdesjen e deritashme shtetërore që u është bërë atyre. Gjithashtu ata kërkojnë që edhe benificionet që u takojnë me ligj t’i gëzojnë që nga janari i këtij viti.