E filloi detyrën si zonja e parë e shtetit me 7 prill 2011, por nuk dihet nëse do ta përfundojë në prillin e sivjetmë kur edhe i  skadon mandati pesë vjeçar.

Sidoqoftë, për këto vite, nuk është vetëm pamja e  Presidentes Atifete Jahjaga, që ka ndryshuar. Ndryshime kanë pësuar edhe llogaritë e saj bankare.

Ato tashmë janë ndryshe jo vetëm për nga shuma e parave që mbajnë, por edhe numri i tyre. Nga një që kishte në vitin 2011, Jahjaga tashmë ka tri sosh, raporton Lajmi.net.

Të dhënat zyrtare në deklarimin e pasurisë në Agjencinë Kundër Korrupsionit (AKK) e dëshmojnë një fakt të tillë.

Mandatin nga police në Presidente ajo e nisi me një llogari bankare, bazuar në deklaratën e nënshkruar  nën qershorin e vitit 2011 e në të cilën kishte 7 mijë e 849 euro.

Përveç edhe një veture të tipit ‘Golf’ , prodhim i vitit 2009, në vlerë 6 mijë euro, Jahjaga personalisht nuk kishte deklaruar diçka tjetër, përjashtuar shumën e pagës  vjetore që kishte llogaritur se do t’i merrte si Presidente, e që ishin 34 mijë e 478 euro.

Të ardhurat vjetore të bashkëshortit si mjek në  QKUK i kishte deklaruar në shumën e 6 mijë e 618 eurove, duke e përmbyllur kështu tërë pasurinë që kishte.

Jahjaga nuk kishte deklaruar patundshmëri, që në fakt ka mbetur e vetmja gjë që nuk ka ndryshuar për të as pesë vjet më vonë  në krye të shtetit.

Ndërkohë,  në deklarimin e bërë në AKK të datës 26 mars 2015, tash gati në fund të mandatit prej gjysmë dekade, Presidentja Jahjaga shkruan se ka veturë të përbashkët me bashkëshortin, të  tipit ‘Skoda New Octavia’ 1.6 TDI,  të blerë me kredi në vlerë prej 16 mijë e 500 euro, raporton Lajmi.net.

Në tri llogaritë bankare, njëra prej të cilave është edhe e bashkëshortit, Presidentja ka shkruar se ka para të gatshme në vlera të ndryshme. Në llogarinë e parë ka 82 mijë e 788 euro, në të dytën janë 3 mijë e 171 euro,  e në të tretën që i përket edhe bashkëshortit, ka 413 euro.

Përveç kësaj, në deklarimin e  fundit, ajo nuk i ka përfshirë të ardhurat vjetore, por i ka shënuar vetëm të ardhurat mujore, duke theksuar se  merr pagë në vlerë prej 2 mijë e 478 euro në muaj, ndërkohë që për bashkëshortin e saj, ka deklaruar se merr 602 euro në muaj.

Sidoqoftë, këtyre shumave u shtohen edhe të ardhurat e mëditjeve që ajo merr. Për një vit, Presidentja ka shkruar se merr 6 mijë e 75 euro vetëm nga mëditjet që sipas ligjit i takojnë./Lajmi.net