Sulmi u krye derisa besimtarët shiitë, pakicë në Arabinë Saudite, ishin duke e falur xhumanë, ndërsa përgjegjësinë për aktin e mori grupi terrorist “Shtetit Islamik i Irakut dhe Sirisë”, që njihet edhe me inicialet ISIS.

Ministria e Brendshme saudite njoftoi se sulmi në Xhaminë Al-Anud në qytetin lindor Damam ka mundur të shkaktojë shumë viktima, porse është penguar nga forcat e sigurisë, të cilat kanë ndaluar makinën e dyshuar përpara se t’i afrohej xhamisë.

Sulmi i sotëm ishte i dyti brenda një jave, pasi të premten e kaluar, nga një sulm vetëvrasës në një xhami shiite në Provincën Lindore, u vranë 21 shiitë, ndërsa dhjetëra të tjerë u plagosen.

Militantët sunitë të ISIS-it po përpiqen të ndezin luftën edhe në Arabinë Saudite, edhe pse shumica e popullit dhe pushteti është në duar të sunitëve. Kjo strategji e ISIS-it ka për qëllim ndëshkimin e pushtetit saudit, që përkrahë sulmet ajrore amerikane ndaj “Shtetit Islamik” në Irak dhe Siri.