Ishin nisur për në Angli, 22 shqiptarë kapen në një kamion frigorifer

Policia franceze ka ndaluar 22 migrantë shqiptarë, nga Kosova e Shqipëria, dhe dy shtetas rumunë, të cilët ishin nisur drejt Britanisë së Madhe.

Lajme

19/03/2015 19:48

Shqiptarët nga Shqipëria dhe Kosova janë kapur në një kamion frigorifer gjatë një kontrolli rutinë të autoriteteve franceze.

Në prangat e policisë ka rëne dhe një çift bashkëshortësh nga Rumania, të cilët udhëhiqnin trafikun. Ata akuzohen për trafik njerëzor dhe mashtrim të autoriteteve franceze.

Rumuni ishte shofer i kamionit dhe kishte marrë përsipër kundrejt shumave të mëdha të parave kalimin e shqiptarëve nga Franca në Britaninë e Madhe, që do të ishte destinacioni i tyre përfundimtar.

Mes të ndaluarve kishte edhe fëmijë, ndërkohë që policia ka nisur hetimet për përfshirje të personave të tjerë në këtë rrjet.

Mësohet se migrantët shqiptarë kishin qëndruar për rreth tre orë në të ftohtë dhe pa ajër, për shkak të izolimit të kamionit.

Fshehja në kamionë, pavarësisht rreziqeve që mbart, është një ndër mënyrat më të përhapura për kalimin e emigrantëve të paligjshëm në Britani.

Pak muaj më parë, dy të rinj shqiptarë u dogjën të gjallë brenda kamionit teksa tentonin të kalonin në Angli.