Ashpërsohet protesta e ish-punëtorëve të Fabrikës së Tubave, pengojnë punën e Kuvendit Komunal
Sot ish punëtorët e Fabrikë së Tubave të Çeliktë në Ferizaj kanë penguar mbarëvajtjen e mbledhjes së rregullt të Kuvendit Komunal në Ferizajt.
Lajme
Po bëhen më shumë se dy javë që ish punëtorët e Fabrikës së Tubave të Çeliktë në Ferizaj, po qëndrojnë në sallën e Kuvendit Komunal të Ferizajt.
Deri tash ata nuk e kanë penguar mbarëvajtjen e mbledhjeve të Kuvendit Komunal të Ferizajt, por sot ata kanë ashpërsuar formën e protestës duke e penguar atë.
Pas kësaj situate lajmi.net njofton se mbledhja e rregullt e Kuvendit Komunal të Ferizajt po mbahet në Qendrën e Kulturës.
Kërkesat e ish punëtorëve janë të thjeshta dhe bazohen në vendime gjykatash. Ndër të tjera, ata kërkojnë kompensimin prej 20 përqind nga privatizimi i ish fabrikës së tyre.
Ish punëtorëve, të drejtë u kanë dhënë të gjitha gjykatat, përfshirë edhe ajo Kushtetuese, por në realitet vendimet nuk po zbatohen.
Pas gati tre vjetësh të grevës nën tendën në qendër të Prishtinës, tash ata protestën e tyre e kanë zhvendosur në ambientet e brendshme të sallës së Kuvendit Komunal në Ferizaj.
Meqë kërkesa e tyre nuk po zbatohet, tash ata po presin që t’i takojnë krerët e shtetit. Po kërkojnë që të takohen me kryeministrin e Kosovës, Isa Mustafa dhe kryetarin e Kuvendit të Kosovës, Kadri Veselin, raporton lajmi.net.