Coveney njoftoi se në planin e hartuar kanë punuar nëntë departamente të qeverisë dhe në të janë përfshirë një numër i madh i çështjeve. Ai ka thënë se dalja e Britanisë nga Bashkimi Evropian në mënyrë të paorganizuar do të ishte humbje e madhe për Mbretërinë e Bashkuar dhe Republikën e Irlandës.

Legjislacioni urgjent është hartuar për t’i mbështetur bizneset, për t’i mbrojtur vendet e punës, shërbimet themelore dhe të drejtat e qytetarëve. Sidoqoftë, ministri ka thënë se shpreson që ky propozim të mbetet në sirtar dhe të mos përdoret.

Dokumenti me 70 faqe është njëri nga propozimet më të hollësishme që është përgatitur ndonjëherë nga qeveria irlandeze. Sidoqoftë, zyrtarët irlandezë thonë se ende shpresojnë në një marrëveshje mes Bashkimit Evropian dhe Britanisë së Madhe në mënyrë që të shmangen pengesat e shumta që do t’i sillte ndarja pa marrëveshje, shkruan “BBC”, transmeton Gazeta Express.