I riu që është arrestuar në mbrëmjen e të premtes nën dyshimin se ka përgatitur një sulm terrorist në Vjenë, është një 18 vjeçar me shtetësi austriake por me prejardhje nga Shqipëria, shkruan standard.at. Ai vjen nga “miljeu shqiptar, pra nuk bën pjesë në mesin e atyre që janë kthyer nga xhihadi dhe ekziston dyshimi se ka një sfond radikal religjioz salafist”, ka thënë ministri austriak i punëve të brendshme, Wolfgang Sobotka në konferencën e mbrëmshme për media, transmeton albinmfo.ch.

Ministri ka thënë po ashtu se si pikë e mundshme e planifikuar për t`u sulmuar ka qenë metroja e qytetit të Vjenës. Por, policia është ende duke bërë vlerësimin e indikacioneve.

Ndërsa një zëdhënës i Ministrisë së Punëve të brendshme ka thënë se personi ka qenë gjithë kohën nën kontroll të autoriteteve të sigurisë. Të dhënat flasin se i dyshuari po përgatiste një sulm me motiv terrorist që do ta bënte në një kohë të afërme.

Personi i arrestuar ka qenë i njohur për policinë si delikuent që ka kryer vepra të imta penale, përcjell albinfo.ch. Me rastin e bastisjeve në banesën e tij dhe në ambiente tjera ku mendohet të ketë frekuentuar ai, janë gjetur telefona celularë  dhe materiale tjera të cilat janë konfiskuar.

Masat e shtuara të sigurisë që janë ndërmarrë lidhur me rastin në Vjenë vazhdojnë të mbeten në fuqi. Policia ka shtuar praninë e saj me uniformë dhe me rroba civile në sheshet më të frekuentuara të qytetit. Qytetarëve u bëhet thirrje për më tepër syçeltësi.